Фото: Муҳсин Умурзоқов / «Халқ сўзи»

«Ўзгидромет» 19-23 январь кунлари кузатиладиган об-ҳаво прогнозини эълон қилди.

Унга кўра, бугун ва эртага Ўзбекистон ҳудудининг катта қисмида ёғингарчиликсиз об-ҳаво бўлиши кутилмоқда. Бугун фақат Навоий вилоятида ва эрталаб Қорақалпоғистон Республикаси, Хоразм вилоятида бироз қор ёғади.

Эртага 20 январь куни фақат республиканинг жанубий-ғарбий ҳудудлари бўйича кечқурун ёғингарчилик (ёмғир, қор) бўлиши мумкин. 21-23 январь кунлари Ўзбекистоннинг катта қисмида вақти-вақти билан ёғингарчилик (ёмғир, қор) бўлади.

Ҳафтанинг биринчи ярмида ҳаво ҳарорати кечалари 3 даража совуқ — 2 даража илиқ, кундуз кунлари 3-8 даража илиқ атрофида бўлади. Ҳафтанинг иккинчи ярмида ҳарорат аста-секин кечалари 2-7 даража совуққача, кундуз кунлари 2 даража совуқ — 3 даража илиққача пасаяди.

Қорақалпоғистон Республикасида ушуб ҳафта давомида ҳарорат асосан кечалари 8-13 даража совуқ, кундуз кунлари 0-5 даража совуқ, 23 январга келиб, 3 даража илиққача бўлади. Баъзи жойларга туман тушиши мумкин. 21-22 январда республиканинг айрим жойларида шамол тезлиги 13-18 м/с гача кучаяди. Тоғли ҳудудларда вақти-вақти билан қор ёғади, қор кўчиши хавфи бор.

Тошкент шаҳрида 19-21 январда ёғингарчилик кутилмайди. Ҳарорат асосан кечалари 2 даража совуқ-1 даража илиқ, бугун ва эртага кундуз кунлари 3-6 даража илиқ, 21 январь-чоршанба куни 7-9 даража илиқ бўлади. Кечаси ва эрталаб туман тушиши мумкин. Шамол шарқдан 3-8 м/с тезликда эсади.

22-23 январда вақти-вақти билан ёғингарчилик (ёмғир, қор) бўлади. Ҳарорат 22 январда кечаси ва кундузи 0-2 даража илиқ, 23 январда кечаси 3-6 даража совуқ, кундузи 0 даража атрофида бўлади. Кечаси ва эрталаб туман тушиши мумкин. Шамол шарқдан 3-8 м/с тезликда эсади.