Иллюстратив фото

Сирдарё вилояти Гулистон шаҳрида 550 миллион сўмлик ноқонуний заргарлик буюмлари савдосининг олди олинди. Бу ҳақда Божхона қўмитаси хабар қилди.

Вилоят божхона бошқармаси тезкор ходимлари Гулистон шаҳар Иқтисодий жиноятларга қарши курашиш департаменти ҳамда Миллий гвардия вакиллари билан ҳамкорликда заргарлик буюмларининг ноқонуний айланувини олдини олиш борасида ўтказилган тезкор тадбирда олдиндан кузатувга олинган фуқаро бир жуфт тилла зиракни 1,1 миллион сўмга сотаётган вақтида тўхтатиб қолинди.

Шундан сўнг, фуқаронинг қўл юклари белгиланган тартибда кўздан кечирилганида унинг ичида хорижда ишлаб чиқарилган, ҳеч қандай тегишли ҳужжатлари бўлмаган, 6 турдан иборат, дастлабки қиймати 550 миллион сўмлик, 576,8 грамм тилла ва кумуш тақинчоқлар борлиги аниқланди ва улар ашёвий далил сифатида олинди.

Аввалроқ Хоразмда ҳам лицензиясиз 5,95 грамм оғирликдаги 1 дона узукни ноқонуний равишда сотаётган фуқаро тўхтатилиб, унда мазкур фуқарога тегишли савдо шохобчаси холислар иштирокида кўздан кечирилганда, дастлабки ҳисоб-китобларда қиймати 1 миллиард сўм бўлган 1 килограммдан зиёд оғирликдаги заргарлик буюмлари вақтинча сақловга олинганди.

Ушбу ҳолатлар юзасидан суриштирув ва терговга қадар текширув ҳаракатлари олиб борилмоқда.