Фото: Архив сурат

25 апрель — Ҳамид Ғулом таваллуд топган кун

Шоир дунёга кўнгил кўзи билан қарар экан, унда фақатгина эзгуликни, яхшиликни, баркамолликни кўришни умид қилади. Унинг бу истаги ҳар бир асарига, сатри ва сўзига кўчиб ўтади, десак, муболаға эмас. «Оҳ, сенинг ёшлигинг менда бўлсайди…” Бу мисраларни эшитган ва ҳис этган одамнинг қалби беихтиёр ёшликнинг масрур туйғулари ва жўшқинликлари, бу даврнинг завқу шавқи билан тўлиб тошади. Таниқли шоир Ҳамид Ғулом ёшликни куйлар экан, инсонни ҳамиша навқирон бўлишга, бу навқиронлик орқали дунёни ёритиб туришга чорлайди. Шоирнинг бошқа битикларида ҳам шундай эзгу тилак устуворлик қилади.

ОҲ, СEНИНГ ЁШЛИГИНГ МEНДА БЎЛСАЙДИ…

Кўнгил ёшлигини ҳар дам қўмсайди,

Оҳ, сенинг ёшлигинг менда бўлсайди!

Такрор этмас эдим бағри тошлигинг,

Оҳ, менда бўлсайди сенинг ёшлигинг!

Намунча енгилсан, намунча дайди!

Оҳ, сенинг ёшлигинг менда бўлсайди!

Бўлмасди беғамлик, бебардошлигинг,

Оҳ, менда бўлсайди сенинг ёшлигинг!

Тонг юлдузи каби бир он кулсайди!

Оҳ, сенинг ёшлигинг менда бўлсайди,

Ўтда ёндирардим кўнгил ғашлигинг,

Оҳ, менда бўлсайди сенинг ёшлигинг!

Юрак илк севгига яна тўлсайди!

Оҳ, сенинг ёшлигинг менда бўлсайди,

Шодлик, кўкламлигинг, серқуёшлигинг

Жаҳон ёритарди худди Ёшлигинг!

КЎКЛАМЛАРИНГ

Ўн саккиз ёш — ўн саккиз кўкламларинг,

Гул ҳаётингда ғанимат дамларинг.

Ўн саккиз йил — ўн саккиз чақмоқ мисол,

Дўстларинг, сирдошларинг, ҳамдамларинг.

Илк муҳаббат нозли меҳмонинг бўлур,

Маҳв этур ишқинг гумону ғамларинг.

Кундузи офтоб йўлингда машъалинг,

Кўқда юлдузлар тунингда шамларинг.

Бир нафас тарк этмагай тун-кечалар

Тушларинг, орзуларинг — ўктамларинг.

Душманинг ҳижрон бўлиб қолгай мудом,

Дўстларинг васл — дардингга малҳамларинг.

Севги уммонига юксакдан отил!

Ишқ — ҳаётингда ғанимат дамларинг.