Статистика агентлиги 2024 йилда Ўзбекистонда етиштирилган гўшт миқдори ва ҳудудлар кесимидаги тақсимоти қандай бўлганини маълум қилди. Агентликка кўра, юртимизда жами 2,9 миллион тонна гўшт (тирик вазнда) етиштирилди. Ушбу кўрсаткич ўтган йилга нисбатан 3,9 фоизга ошган.

Барчага маълум бўлганидек, ҳудудлар кесимида Қашқадарё вилояти гўшт етиштириш бўйича етакчиликни қўлга киритди. Вилоятда 345,9 минг тонна гўшт етиштирилган бўлиб, бу умумий ҳажмнинг энг катта қисмини ташкил этган. Иккинчи ўринда Самарқанд вилояти 326,9 минг тонна гўшт ҳосили билан, учинчи ўринда эса Бухоро вилояти 312,7 минг тонна гўшт ҳажми билан қайд этилди.

Тошкент вилояти ҳам юқори кўрсаткичларга эришган бўлиб, вилоятда 312,3 минг тонна гўшт етиштирилган. Шунингдек, Жиззах вилояти 246,8 минг тонна, Сурхондарё вилояти эса 220 минг тонна гўшт етиштирган ҳолда катта ҳисса қўшган.

Республика бўйича энг кам гўшт етиштирилган ҳудудлар Қорақалпоғистон Республикаси (129,8 минг тонна) ва Сирдарё вилояти (80,4 минг тонна) бўлди. Бу кўрсаткичлар ҳудудларнинг қишлоқ хўжалиги салоҳияти ва ер-иқлим шароитлари билан боғлиқдир.

Ушбу рақамлар Ўзбекистонда гўшт ишлаб чиқаришнинг ўсиш суръатларини ва қишлоқ хўжалигидаги самарадорликни акс эттиради. Бу эса, аҳолининг озиқ-овқат хавфсизлигини таъминлаш йўлидаги муҳим қадамлардан биридир.