Оқ уй Ғазо бўйича Трамп маъмурияти тузаётган янги “Тинчлик кенгаши”нинг асосий таркибини эълон қилди. BBC хабар беришича, АҚШ президенти Дональд Трамп раислик қиладиган таъсисчи Ижроия кенгаши Ғазони вақтинча бошқариш ва уни қайта тиклаш билан шуғулланадиган технократлар қўмитаси фаолиятини назорат қилади.

Ҳар бир аъзо “Ғазони барқарорлаштириш учун муҳим” йўналишга масъул бўлиши кутилмоқда, бироқ портфеллар ҳозирча тақсимланмади. Юқори даражада аёллар ва фаластинликлар йўқ, аммо қўшимча аъзолар яқин ҳафталарда эълон қилиниши айтилди.

Ижроия кенгашига киритилган энг баҳсли номлардан бири — Буюк Британиянинг собиқ бош вазири Тони Блэр. У 1997–2007 йилларда ҳукуматни бошқарган ва 2003 йилда Ироқ урушига кириш қарори сабаб танқидларга учраган. Блэр 2007–2015 йилларда БМТ, ЕИ, АҚШ ва Россиядан иборат “Тўртлик”нинг Яқин Шарқ бўйича элчиси бўлган. У ижроия кенгашидаги АҚШ фуқароси бўлмаган ягона аъзо ҳисобланади ва Трампнинг Ғазо режаларини “икки йиллик уруш ва азоб-уқубатни тугатиш учун энг яхши имконият” деб атаган.

АҚШ давлат котиби Марко Рубио ташқи сиёсатда марказий фигура сифатида кенгашга киритилди. Трамп ҳокимиятга қайтишидан олдин у Ғазода ўт очишни тўхтатишга қарши чиққан, кейинчалик эса октябрда имзоланган Исроил—ҲАМАС келишувининг биринчи босқичини “энг яхши ва ягона режа” деб баҳолаган. Шу ойда у Исроил парламентининг Ғарбий Соҳилни аннексия қилишга оид қадамларини ҳам танқид қилган.

Яқин Шарқ бўйича АҚШ махсус вакили Стив Уиткофф ҳам кенгаш аъзоси бўлади. У яқинда Ғазодаги урушни якунлаш режасининг иккинчи босқичи бошланганини эълон қилиб, у қайта қуриш ва тўлиқ демилитаризацияни, жумладан ҲАМАСни қуролсизлантиришни назарда тутишини айтган. Виткофф келишув шартларига амал қилинмаса, “жиддий оқибатлар” бўлишини огоҳлантирган. Шу билан бирга, у Россия—Украина музокараларида ҳам асосий воситачи сифатида иштирок этган.

Трампнинг куёви Жаред Кушнер ташқи сиёсат музокараларида муҳим роль ўйнаб келмоқда. У Виткофф билан бирга Россия—Украина ва Исроил—Ғазо йўналишларида воситачилик қилган, ноябрда эса Исроил бош вазири Биньямин Нетаньяху билан тинчлик келишувидаги мураккаб масалаларни муҳокама қилган. Кушнер 2024 йилда Гарвард университетидаги чиқишида “Ғазо соҳилбўйи мулки катта қийматга эга бўлиши мумкин” деган баёноти билан ҳам эътибор тортган.

Кенгаш таркибига шунингдек, “Apollo Global Management” бош директори, миллиардер Марк Роуэн ва Жаҳон банки президенти Ажай Банга киритилди. Банга 1959 йил Ҳиндистонда туғилган, 2007 йилда АҚШ фуқаролигини олган ва 2023 йилда Жо Байден томонидан Жаҳон банки раҳбарлигига номзод қилинган. Ижроия кенгашининг яна бир аъзоси — миллий хавфсизлик бўйича маслаҳатчи Роберт Габриэл бўлиб, у Трамп билан 2016 йилдан бери ишлаб келади.

Шу билан бирга, болгариялик сиёсатчи ва БМТнинг собиқ Яқин Шарқ элчиси Николай Младенов Ғазодаги ишларни жойида мувофиқлаштирувчи вакил этиб тайинланди. У урушдан кейинги даврда кундалик бошқарувни амалга оширадиган 15 нафар фаластинлик технократдан иборат Миллий қўмита (NCAG) фаолиятини назорат қилади. Қўмитага Фаластин маъмуриятида собиқ ўринбосар вазир бўлган Али Шаат раҳбарлик қилади.