Франциялик Европарламент депутати Рафаэль Глюксманн АҚШ расмийларидан Озодлик ҳайкалини Францияга қайтаришни талаб қилди. Унга кўра, АҚШнинг ҳозирги сиёсати ва айниқса, Доналд Трамп маъмуриятининг қарорлари мамлакатнинг озодлик қадриятларига содиқ эмаслигини кўрсатмоқда. Глюксманн бу фикрларини 17 март куни «Place publique» партияси йиғилишида маълум қилди, деб хабар бермоқда AFP.

Қайд этилишича, депутат ўз нутқида АҚШнинг Россия билан яқинлашаётганини танқид қилиб, Вашингтон «золимлар томонида туриш» қарорини қабул қилган. Шунингдек, у Трамп маъмуриятини илмий эркинликни ёқлаган олимларни ишдан бўшатгани учун ҳам қоралади. Шу сабабли, Глюксманн АҚШга ҳайкални қайтариш ҳақида чақириқ йўллади: «Биз уни сизга ҳадя қилган эдик, лекин сиз бу рамзни ҳурмат қилмайсиз», – деди у.

Озодлик ҳайкали XIX асрда француз ҳайкалтароши Огюст Бартольди бошчилигида яратилиб, АҚШга Франциянинг мустақиллик урушидаги кўмагининг рамзи сифатида ҳадя қилинган. 46 метр баландликдаги ушбу мис ҳайкал 1886 йилда Нью-Йоркдаги Озодлик оролида очилган. У АҚШга келаётган миллионлаб муҳожирлар учун янги ҳаётга умид тимсоли бўлиб хизмат қилган.

Глюксманннинг даъвоси расмий талаб эмас, аммо у Доналд Трампнинг тарихий қарорларни қайта кўриб чиқишга мойил сиёсатини эсга солувчи ҳаракат сифатида баҳоланмоқда. Трамп президентликка сайланишидан олдин ҳам бир қатор тарихий ўзгаришларни амалга оширишга ваъда берган эди.

Европарламент депутатининг АҚШдан Озодлик ҳайкалини қайтаришни талаб қилиши ҳозирча расмий позиция эмас. Аммо бу талаб Франция ва АҚШ ўртасидаги қадриятлар ва эркинлик тушунчаси борасидаги фарқларни яна бир бор юзага чиқаргани билан аҳамиятлидир.