Бош прокуратура ҳузуридаги Департаментнинг Сурхондарё вилояти бўлими кадастр ҳужжатларини расмийлаштириб беришни ваъда қилиб, фуқароларни чув туширган муҳандис ва сохта кадастр ходимини аниқлади. Бу ҳақда Департаментнинг матбуот хизмати хабар қилган.

Маълум бўлишича, Кадастрлар палатаси Денов тумани филиали муҳандиси Ў.Н. фуқаро А.Н.нинг ишончига кириб, унинг акасига тегишли уй-жойнинг кадастр ҳужжатларини 2 минг АҚШ доллари эвазига расмийлаштириб беришини айтиб, 1 минг 800 АҚШ доллари ва 2,5 млн сўмни олган вақтида ашёвий далиллар билан ушланган.

Шу каби яна бир ҳолат Қумқўрғон туманида аниқланган. Қайд этилишича, ўзини гўёки Қумқўрғон тумани кадастр бўлими ходими сифатида таништирган фуқаро Ф.Б. фуқаро Х.П.нинг ишончига кириб, унинг Қумқўрғон тумани «Мехрабод» маҳалласида жойлашган уй-жойинг кадастр ҳужжатларини расмийлаштириб бериши эвазига 11 миллион сўм талаб қилган. У келишилган пулни олаётган вақтида ашёвий далиллар билан ушланган.

«Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда», дейилади хабарда.

Аввалроқ, собиқ «электросеть» муҳандиси тадбиркорни 7 минг АҚШ долларига чув туширмоқчи бўлгани ҳақида хабар берилганди.