Фото: Reuters

Қатарда давом этаётган жаҳон чемпионатининг чорак финалида Аргентина Нидерландияга қарши баҳс олиб борди. Ушбу учрашувнинг асосий ва қўшимча бўлимлари 2:2 ҳисобида якунланди ҳамда ўйинда аргентиналиклар пенальтилар сериясидаги 4:3 ҳисобида ғалаба қозонди.

Мазкур баҳсни испаниялик ҳакам Антонио Матеу Лаос бошқариб борди ва ўйин давомида умумий ҳисобда 15 та сариқ карточка кўрсатди. Бу жаҳон чемпионатлари тарихидаги рекорд кўрсаткич ҳисобланади.

«Мундо Депортиво» нашри хабарига кўра, ФИФА Аргентина терма жамоасига нисбатан интизомий иш очган. Бунга 3 та жиҳат — Лионел Мессининг Нидерландия мураббийлар штаби билан жанжаллашиб кетгани ҳамда ҳакамни кескин танқид қилгани, Аргентина дарвозабони Эмилиано Мартинеснинг бош ҳакам Матеу Лаосни жаҳон чемпионатлари тарихидаги энг ёмон ҳакам, дея атагани ва аргентиналик футболчиларнинг ўйин давомида содир этган номақбул хатти-ҳаракатлари асос бўлган.

Ўйин якуни арафасида Аргентина терма жамоаси аъзоси Леандро Паредес рақиб жамоа аъзосини атай оёғидан чалиб, кескин жанжал келиб чиқишига сабабчи бўлган. Шунингдек, Отаменди ва бошқа аргентиналиклар Нидерландия захира футболчилари олдига бориб пенальтилар сериясидаги голни масхара қилиб нишонлашган. Интизомий иш бўйича якуний қарор тез орада эълон қилинади.