Фарғонада катта миқдордаги табиий газдан ноқонуний фойдаланган автомобилларга газ тўлдириш компрессор шохобчаси аниқланди.

«Турват» саноат тармоғидан табиий газ билан таъминланувчи «Н. И. Б.» МЧЖга қарашли мазкур АГТКШда газдан фойдаланиш ҳолати ўрганилганда, ўлчов тизимидаги қурилмаларга ташқи таъсир ўтказилгани маълум бўлди.

Ҳолат юзасидан тегишли тартибда далолатнома тузилиб, табиий газ ҳажмлари қайта ҳисоб-китоб қилинди ва 2 миллиард 901 миллион сўмлик зарар ҳисобланди. Мазкур иш бўйича барча ҳужжатлар ҳуқуқ-тартибот органларига юборилди.

Бундан ташқари, Ўзенергоинспекция Қашқадарё вилоят ҳудудий бошқармаси ва вилоят прокуратураси ҳамкорликда ўтказилган назорат тадбирида Касби тумани «Комилон» МФЙда жойлашган «М. С. С.» ЙТТга қарашли савдо дўкони ўзбошимчалик билан тармоққа уланиб, электр энергиясидан ноқонуний фойдаланганлиги аниқланди.

Ушбу қоидабузарлик натижасида дастлабки ҳисоб-китобларга кўра электр таъминоти корхонасига 181,7 миллион сўмлик зарар етказилган.

Ҳозирда ҳуқуқни муҳофаза қилиш органлари томонидан терговга қадар текширув ишлари олиб борилмоқда.