Фарғона жамоат саломатлиги тиббиёт институти профессор-ўқитувчилари томонидан вилоят бўйлаб бепул тиббий кўриклар ўтказиб бориш яхши анъанага айланган. Хусусан, жорий йилнинг 26 ноябрь кунидан бошлаб Фарғона шаҳрида жойлашган 11 та оилавий поликлиникада режа-жадвали асосида навбатдаги бепул тиббий кўриклар бўлиб ўтмоқда.

Бу галги кенг қамровли тиббий акциядан кўзланган асосий мақсад профилактик текширувларни самарали ташкил этиш ва касалликларни эрта аниқлашга қаратилган. Шунингдек, акция жараёнида аҳоли ўртасида соғлом турмуш тарзини тарғиб этиш, тўғри ва соғлом овқатланиш, спорт билан шуғулланиш ҳамда жисмоний фаолликни ошириш билан боғлиқ тушунтириш-тарғибот ишлари олиб борилади.

Акция доирасида 10 дан ортиқ йўналишда умумий ва тор соҳа шифокорлари кўриги, профилактик текширувлар, тиббий тавсиялар ва керакли йўлланмалар ҳамда амалий маслаҳатлар берилади. Ҳар қандай кўрик мутлақо бепул бўлиб, унда оиланинг барча аъзолари иштирок этиши мумкин.

—Бугун ўзимиз истиқомат қиладиган маҳаллада жойлашган 1-оилавий поликлиникада фарзандларим билан бирга кўрикдан ўтиб, керакли маслаҳатларни олдик,—дейди Фарғона шаҳрида истиқомат қилувчи Лобар Азизова.—Соғлигимизни асраш ва касалликларни эрта аниқлашга хизмат қилувчи бундай кўриклар доимий равишда ўтказиб келинаётгани бизни беҳад мамнун этади.

Юзма-юз мулоқотда мутахассислар юқумли касалликлар мавсуми бўлган ушбу кунларда болалар соғлигини ҳимоя қилиш бўйича зарурий тавсиялар беришди. Шунингдек, ҳаво ифлосланиши шароитида кўчада имкон қадар ниқоб тақиб юриш ҳамда дармондориларга бой табиий маҳсулотларни кўпроқ истеъмол қилиш муҳимлиги таъкидланди.

Айтиш жоиз, Фарғона шаҳри бўйлаб ўтказилиши кўзда тутилган тиббий кўриклар 9 декабрь санасига қадар давом этиши режалаштирилган.

Ботир МАДИЁРОВ, “Халқ сўзи”.