Самарқанд шаҳар “Инсон” ижтимоий хизматлар маркази томонидан ногиронлиги бўлган шахслар, ёлғиз кексалар ҳамда узоқ муддат парваришга муҳтож инсонлар учун 5 турдаги ижтимоий хизматлар ташкил этилди. Уй шароитида ижтимоий-маиший ёрдам, қараб туриш, тиббий-ижтимоий реабилитация, кундузги қатнов асосида қараб туриш ва шахсий ёрдамчи каби хизматлар шулар жумласидан.

Шу асосда Самарқанд шаҳрида ижтимоий ҳимояга муҳтож фуқароларни қўллаб-қувватлаш, уларнинг ҳаёт сифатини яхшилашга қаратилган яна бир лойиҳа старт олди.

Янги лойиҳа “Самарқанд халқаро саломатлик фанлари олий мактаби” МЧЖ томонидан йўлга қўйилган бўлиб, унда камбағал оилаларда яшовчи 40 нафар ногиронлиги бўлган фуқароларга хизмат кўрсатилади.

Хизмат ҳафтасига 5 кун давомида ташкил этилиб, иштирокчилар ҳар куни яшаш манзилидан бепул автобусда марказга олиб келинади ва кечга яна уйларига етказилади.

Бу масканда улар учун реабилитация ва соғломлаштириш машғулотлари, жисмоний машқлар, тўғри овқатланиш бўйича амалий машғулотлар, физиотерапия хизматлари, маданий-маърифий ва кўнгилочар тадбирлар олиб борилади.

Ушбу лойиҳа ногиронлиги бўлган шахсларнинг фаол ҳаётга қайтиши, жамиятга интеграция бўлиши ҳамда психологик-эмоционал ҳолатини қўллаб-қувватлашга хизмат қилади.

Абдулазиз ЙЎЛДОШЕВ

(«Халқ сўзи»).