Европа комиссияси Украинага қўшимча 6 миллиард евро ўтказади ва Киевни янада қўллаб-қувватлаш учун музлатилган Россия активларидан фойдаланишни таклиф қилади. Бу ҳақида BILD нашри маълум қилди.

Унда айтилишича, Европа комиссияси президенти Урсула фон дер Ляен парламентдаги нутқида Украинага қарийб 6 миллиард евро қўшимча молиявий ёрдам кўрсатилишини маълум қилган. Шунингдек, ушбу маблағлар орасида Европа Иттифоқида музлатилган Россия давлат активларидан фоиз даромади орқали қайтариладиган кредит ҳам борлигини қўшимча қилган.

Европа комиссияси раҳбарининг таъкидлашича, Россия президенти Владимир Путин ҳали ҳам Европа Иттифоқини эътиборсиз қолдирмоқда ва жанг майдонида ўз мақсадларига эриша олишига ишонмоқда.

«Бу эътиборсизлик фонида Европа Иттифоқи Киевга молиявий ёрдамини тезлаштириши ва кенгайтириши лозим», — дейилади Урсула фон дер Ляен баёнотида.

Шунингдек, Европа комиссияси Украина учун янги узоқ муддатли молиялаштириш вариантларини ҳам тақдим қилган. Европа комиссияси раҳбари музлатилган Россия активларидан фойдаланишни қўллаб-қувватлаган ва бу таклифни «энг самарали йўл» деб атаган.