Yevropa komissiyasi Ukrainaga qoʻshimcha 6 milliard yevro oʻtkazadi va Kiyevni yanada qoʻllab-quvvatlash uchun muzlatilgan Rossiya aktivlaridan foydalanishni taklif qiladi. Bu haqida BILD nashri maʼlum qildi.

Unda aytilishicha, Yevropa komissiyasi prezidenti Ursula fon der Lyayen parlamentdagi nutqida Ukrainaga qariyb 6 milliard yevro qoʻshimcha moliyaviy yordam koʻrsatilishini maʼlum qilgan. Shuningdek, ushbu mablagʻlar orasida Yevropa Ittifoqida muzlatilgan Rossiya davlat aktivlaridan foiz daromadi orqali qaytariladigan kredit ham borligini qoʻshimcha qilgan.

Yevropa komissiyasi rahbarining taʼkidlashicha, Rossiya prezidenti Vladimir Putin hali ham Yevropa Ittifoqini eʼtiborsiz qoldirmoqda va jang maydonida oʻz maqsadlariga erisha olishiga ishonmoqda.

“Bu eʼtiborsizlik fonida Yevropa Ittifoqi Kiyevga moliyaviy yordamini tezlashtirishi va kengaytirishi lozim”, — deyiladi Ursula fon der Lyayen bayonotida.

Shuningdek, Yevropa komissiyasi Ukraina uchun yangi uzoq muddatli moliyalashtirish variantlarini ham taqdim qilgan. Yevropa komissiyasi rahbari muzlatilgan Rossiya aktivlaridan foydalanishni qoʻllab-quvvatlagan va bu taklifni “eng samarali yoʻl” deb atagan.