Ўзбекистон Республикаси Марказий банки ҳозирги кунда мамлакатимиз ҳудудида эски намунадаги 100 АҚШ доллари номиналидаги банкнотларни банклар томонидан сотиш ва сотиб олиш амалиётларининг ҳеч қандай муаммоларсиз амалга оширилаётганини маълум қилди.

Шу билан бирга, ушбу банкнотлар қонуний тўлов воситаси сифатидаги мақоми ўзгармаган. Марказий банк аҳоли ва тадбиркорлик субъектларини ижтимоий тармоқларда тарқалаётган тасдиқланмаган маълумотларга ишонмасликка, фақат расмий манбаларга таянишга чақирди.

Агар тижорат банклари ёки валютани айирбошлаш шохобчаларида эски намунадаги 100 АҚШ долларини қабул қилишда қийинчиликларга дуч келсангиз, Марказий банкнинг «Ишонч телефони» (71 200-00-44) ёки ҳудудий бошқармаларга мурожаат қилишингиз мумкин.

Эслатиб ўтамиз, «Валютани тартибга солиш тўғрисида»ги Ўзбекистон Республикаси Қонунига мувофиқ, мамлакатимиз ҳудудида валюта операциялари фақат маҳаллий банклар орқали амалга оширилиши лозим.