Фото: dzen.ru

«Париж-2024» чемпиони, жазоирлик боксчи Иман Ҳалиф ёзувчи Жоан Роулинг, миллиардер Илон Маск ва АҚШнинг 45-президенти Доналд Трампнинг устидан Париж прокуратурасига шикоят йўллади. Бу ҳақда «Variety» нашри хабар берди.

Маълум бўлишича, жазоирлик спортчи ўзига нисбатан қилинаётган ҳақоратлар ортидан шикоят қилиш қарорига келган. Иман Ҳалиф айбланувчиларнинг айнан қайси постлари даъвога асос бўлганини маълум қилмаган. Шунга қарамасдан, ёзувчи Жоан Роулинг Ҳалифнинг Олимпиададаги жангларидан бирини «жамоатчиликни қизиқтириш учун аёлни калтаклаётган эркак томошаси» деб атаганига нисбатан жиноий иш очишни сўраган.

«Бироқ, бу ёлғонларнинг жиддий оқибатлари бор. Бундай бузилишлар яқин орада кимнидир ўлдириши мумкинлигидан қўрқиш муболаға бўлмайди», деб ёзган машҳур ёзувчи.

«Аёллар спортида эркакларга ўрин йўқ», деб ёзган америкалик сузувчи Райли Ҳейнснинг твитига Илон Маск «Мутлақо!» дея шарҳ қолдирган. Доналд Трамп Ҳалиф жангидан олинган суратни эълон қилиб «Мен эркакларнинг аёллар спортига киришига рухсат бермайман!» дея шарҳ қолдирган.

Жазоирлик боксчи Париждаги Олимпиадасида бокс бўйича олтин медалга эга чиққанди. Ушбу ғалаба Жазоирнинг аёллар бокс тарихидаги биринчи ғалабаси ҳисобланади. Спортчи 2023 йилги Жаҳон чемпионатида ИБА томонидан ўтказилган гендер тестидан муваффақиятсизликка учрагани ортидан дисквалификация қилинганди.

Қайд этиш керакки, Ўзбекистон Бош вазири Абдулла Арипов Хитой Тайпейи спортчиси Линь Юйтинга қарши жанг қилган Ситора Турдибековани қўллаб қувватлаб, «Халқимизга ёқмаган нарса эркак болаларнинг аёлларнинг кийимини кийиб чиққани бўлди», деган эди.

Аввалроқ, Равшан Эрматов оғир жудоликка учрагани ҳақида хабар берилганди.