Франция пойтахтида ўтказилаётган ёзги Олимпиада ўйинларида -57 кг вазн тоифасида рингга чиққан боксчимиз Ситора Турдибекова икки карра жаҳон чемпиони, Хитой Тайпейи вакили Ю Тинг Лин билан беллашган ҳамюртимиз 5:0 ҳисобида имкониятни бой берди ва жорий Олимпиададаги иштирокини якунлаганди.

Гап шундаки, Халқаро бокс ассоциацияси (IBA) тестостерон миқдори кўплиги боис жазоирлик Имане Хелиф ва Хитой Тайпейи вакили Ю Тинг Линни сўнгги жаҳон чемпионатида иштирокига рухсат бермаган эди. Ассоциация президенти Умар Кремлев Ю Тинг Линга ютқазган Ситора Турдибекова ва Жазоир вакиласига қарши жанг қилишни истамаган Анжела Карига ваъда қилинган мукофот пулини беришга қарор қилди.

Қайд этиш керакки, май ойида IBA раҳбарияти «Париж-2024» ўйинлари медаль совриндорларини мукофот пули билан тақдирлашга қарор қилганди. IBA расмий сайти ушбу қарорни эълон қилиб, аёллар боксидаги адолатсизликдан афсус билдирган.

Бокс турнирида олтин медаль соҳиблари умумий мукофот пули сифатида 100 минг АҚШ доллари, иккинчи ўрин 50 минг, учинчи ўринни олганлар эса 25 минг АҚШ доллар олиши керак эди.

Аввалроқ, Анна Пракатен Олимпиада ўйинларини 11-ўринда якунлагани ҳақида хабар берилганди.