Туркия президенти Режеп Таййип Эрдоған Россия ва Украина ўртасида бевосита музокаралар ташкил этилишига кўмаклашишга тайёр эканини маълум қилди. Унинг айтишича, бундай учрашувлар учун Истанбул муносиб майдон бўлиши мумкин. Бу ҳақда Туркия раҳбарининг коммуникациялар бўйича бошқармаси раҳбари Бурҳанеттин Дуран Эрдоғаннинг «Коалиция иштирокчилари» саммитидаги видео-мурожаатидан сўнг маълум қилди.

«Президент таъкидлашича, Туркия адолатли ва барқарор тинчликка эришишни тезлаштириш мақсадида томонлар ўртасидаги бевосита алоқаларга кўмаклашиш борасидаги дипломатик саъй-ҳаракатларни давом эттиради. У, шунингдек, бевосита музокаралар Истанбулда бўлиб ўтиши мумкинлигини қайд этди», — деди Дуран.

Қайд этилишича, Россия ва Украина ўртасидаги бевосита алоқалар уч йилдан ортиқ танаффусдан сўнг 2025 йил май ойида қайта тикланган эди.

Биринчи учрашув Истанбулда ўтган бўлиб, тахминан икки соат давом этган. У ерда томонлар ўт очишни тўхтатиш бўйича ўз шартларини батафсил баён қилувчи таклифларини тақдим этишга келишиб олган, шунингдек, катта миқёсдаги асирлар алмашинуви масаласи муҳокама қилинган.

Иккинчи босқич музокаралар июнь ойида ўтказилган ва у ҳам Истанбулда бўлиб ўтган. Россия ўзининг тинчлик шартлари ҳақида меморандум лойиҳасини тақдим этган, Украина эса бир неча кун аввал шунга ўхшаш ҳужжатни Россия томонига берган эди. Томонлар яна катта миқёсда асирлар алмашинуви ўтказган ва ҳалок бўлганларнинг жасадларини ўзаро топшириш ниятини тасдиқлаган.

Учинчи учрашув июль ойида ўтказилиб, унда томонлар июнь бошида алмашилган меморандум лойиҳаларини муҳокама қилишган.