Молиячи Жеффри Эпштейн томонидан жинсий зўравонликка учраган саккиз нафар аёл АҚШ президенти Дональд Трампга нисбатан импичмент жараёни бошлашни талаб қилмоқда.

Маълум қилинишича, импичмент талаби 2025 йил 19 декабрь куни Эпштейн иши бўйича эълон қилинган ҳужжатларда айрим маълумотлар таҳрирлангани ҳамда ҳукумат муддати ўтиб кетганига қарамай қолган материалларни ошкор қилишдан бош тортгани билан боғлиқ.

Жабрланувчилардан бири Хейли Робсон АҚШ маъмуриятининг бу ҳаракатларини қонунга зид деб баҳолаб, ишга оид барча файлларни тўлиқ очиқлашни талаб қилди. У аввалроқ Республикачилар партияси ва шахсан Доналд Трампни қўллаб-қувватлаб келганини, аммо ҳозир ўзини хиёнатга учрагандек ҳис қилаётганини айтган.

Шунингдек, жабрланувчилар АҚШ бош прокурори Пем Бонди ҳамда ФҚБ директори Кеш Пателнинг истеъфосини ҳам талаб қилмоқда. Уларнинг фикрича, мазкур мансабдор шахслар тергов жараёнида ваъда қилинган шаффофликни таъминлай олмаган. Даъвогарларнинг таъкидлашича, материалларнинг катта қисми ёпиқ қолиши учун Адлия вазирлиги ва ФҚБ раҳбарияти жавобгар ҳисобланади.

Қайд этилишича, 2024 йилги президентлик сайлови кампанияси давомида Дональд Трамп Жеффри Эпштейн ишига оид барча ҳужжатларни тўлиқ ошкор қилишга ваъда берган. Бироқ кейинчалик у ўз позициясини ўзгартириб, мазкур ҳужжатларнинг эълон қилиниши унинг маъмурияти фаолиятидаги ютуқлардан эътиборни чалғитиши мумкинлигини билдирган.