28–февраль куни «Иқтисодиётда рақобатни ривожлантириш ва хусусий секторнинг ролини янада ошириш чора-тадбирлари тўғрисида»ги Президент Фармони қабул қилинди.

Фармонга кўра, мулкчилик шаклидан қатъи назар, хўжалик юритувчи субъектлар ва давлат ташкилотларига муайян товарларни ишлаб чиқариш, сотиш ёхуд сотиб олиш, шунингдек, ягона операторлик хизматларини кўрсатиш бўйича берилган мутлақ ҳуқуқ эксклюзив ҳуқуқ сифатида тан олинади.

Бундай ҳуқуқ қонунчилик ҳужжатлари билан истисно тариқасида берилган рухсат ёки умумий тартибдан ташқари равишда берилган якка тартибдаги лицензия асосида тақдим этилади. Танлов (тендер) асосида тақдим этилган лицензиялар эксклюзив ҳуқуқ ҳисобланмайди.

Бундан ташқари, 2025 йил 1 апрелдан эксклюзив ҳуқуқ хўжалик юритувчи субъектларга қонунлар, Президент фармони ва қарорлари билан 3 йилдан ортиқ бўлмаган муддатга конституциявий тузумни, аҳолининг соғлиғини, Ўзбекистон мудофаа қобилиятини, давлат ва жамоат хавфсизлигини ҳамда жамоат тартибини таъминлаш ёки табиий офатлар, ҳалокат ва эпидемияларнинг олдини олиш, уларни бартараф этиш мақсадлар учун берилади.