28–fevral kuni “Iqtisodiyotda raqobatni rivojlantirish va xususiy sektorning rolini yanada oshirish chora-tadbirlari toʻgʻrisida”gi Prezident Farmoni qabul qilindi.

Farmonga koʻra, mulkchilik shaklidan qatʼi nazar, xoʻjalik yurituvchi subyektlar va davlat tashkilotlariga muayyan tovarlarni ishlab chiqarish, sotish yoxud sotib olish, shuningdek, yagona operatorlik xizmatlarini koʻrsatish boʻyicha berilgan mutlaq huquq eksklyuziv huquq sifatida tan olinadi.

Bunday huquq qonunchilik hujjatlari bilan istisno tariqasida berilgan ruxsat yoki umumiy tartibdan tashqari ravishda berilgan yakka tartibdagi litsenziya asosida taqdim etiladi. Tanlov (tender) asosida taqdim etilgan litsenziyalar eksklyuziv huquq hisoblanmaydi.

Bundan tashqari, 2025-yil 1-apreldan eksklyuziv huquq xoʻjalik yurituvchi subyektlarga qonunlar, Prezident farmoni va qarorlari bilan 3-yildan ortiq boʻlmagan muddatga konstitutsiyaviy tuzumni, aholining sogʻligʻini, Oʻzbekiston mudofaa qobiliyatini, davlat va jamoat xavfsizligini hamda jamoat tartibini taʼminlash yoki tabiiy ofatlar, halokat va epidemiyalarning oldini olish, ularni bartaraf etish maqsadlar uchun beriladi.