Фото: Видеодан кадр

Парижда бўлиб ўтаётган Паралимпиадада Ўзбекистон делегацияси аъзоси Кумуш Хўжаева парадзюдо бўйича баҳсларни иккинчи ўрин билан якунлади.

Кумуш Хўжаева аёллар ўртасида J2 классида (кўзи қисман кўрадиган спортчилар беллашади) -57 кг вазн тоифасида яримфиналда испаниялик Марта Арче Пойнони мағлуб этди (1:0) ва финал баҳси учун йўлланма олди.

Финалда ўзбекистонлик спортчи япониялик Хиросе Жункога қарши татамига чиқди. Аммо ҳал қилувчи беллашувда Хўжаева 10:0 ҳисобида имкониятни бой берди.

Шунингдек, эркаклар ўртасида J2 классида -73 кг вазн тоифасида баҳс олиб борган Учқун Қуронбоев яримфиналда грузиялик рақиби Жиоржи Калданига 10:0 ҳисобида ютқазиб қўйди. У бронза медали учун беллашувда жанубия кореялик Ким Донгунга қарши татамига чиқди ва ғалабага эришиб (1:0), учинчи ўринни эгаллади.

Маълумот учун, Қуронбоев Токио-2020 Паралимпия ўйинларида -66 кг вазн тоифасида олтин медални қўлга киритганди. Бугунги ютуқ унинг ўйинлардаги иккинчи медали бўлди.

Бу орқали Ўзбекистоннинг турнирдаги медаллар жамланмаси 22 тага етди: 9 та олтин, 7 та кумуш, 6 та бронза. Делегатсия онлайн медаллар жадвалида 12-ўринда бормоқда.