Дунёдаги энг йирик ва нуфузли шахмат клубларидан бири ҳисобланган «Saint Louis Chess Club» халқаро гроссмейстер Гулруҳбегим Тоҳиржонованинг АҚШ федерациясидан чиқиб, Ўзбекистон шахмат федерациясига қайтиши юзасидан расмий баёнот берди.

Клуб ўз баёнотида ушбу қарорни қайғу билан эълон қилишаётганини таъкидлади. Маълум қилинишича, Тоҳиржонова шахсий сабабларга кўра ўз федерациясини Ўзбекистонга кўчиришга қарор қилган ва бу ҳақда Ўзбекистонда бўлиб ўтган матбуот анжуманида расман эълон қилинган.

«Saint Louis Chess Club» ўз баёнотида Гулруҳбегимнинг АҚШ федерацияси сафида ўйнаган йилларидаги хизматларини юқори баҳолаб, унинг клуб ва «World Chess Hall of Fame» учун қўшган улкан ҳиссаси учун миннатдорчилик билдирди. Клуб вакиллари унинг фидойилиги, тинимсиз меҳнати ҳамда ижобий кайфиятини доимо қадрлашларини ва уни соғинишларини таъкидлашди.

Гулруҳбегим Тоҳиржонова 2019 йилдан бери АҚШ шахмат федерацияси шарафини ҳимоя қилиб келаётган эди. Ушбу қарор унинг шахматдаги янги босқичга чиқиш истагини ифодалаши мумкин. Клуб унга келгусидаги шахмат фаолиятида муваффақиятлар тилаб қолишини маълум қилди.

Тоҳиржонованинг Ўзбекистонга қайтиши миллий шахмат жамоаси учун муҳим янгилик бўлиб, унинг халқаро майдондаги тажрибаси ёш авлод шахматчилари учун катта илҳом манбаи бўлиши кутилмоқда. Шу тариқа, Ўзбекистон шахмат саҳнасида янги давр бошланиши мумкин.