АҚШ президенти Доналд Трамп Россия президенти Владимир Путинга нисбатан кескин баёнотлар билан чиқди. Унинг сўзларига кўра, Москва тинчлик музокараларига нисбатан иккиюзламачи позиция тутмоқда.

Қўшма Штатлар раҳбари Флорида штатининг Палм-Бич шаҳрида жойлашган Мар-а-Лаго қароргоҳида журналистлар билан мулоқот чоғида Россия етакчиси билан бўлган сўнгги суҳбати ҳақида гапирди. Трампнинг айтишича, Путин унга шахсан қўнғироқ қилиб, Украина дронлари томонидан Валдайдаги қароргоҳига ҳужум уюштирилганини маълум қилган.

«Бу яхши ҳолат эмас. Айниқса, музокаралар давом этаётган бир пайтда бундай ҳужумлар ўринсиз. Бу мени жуда ғазаблантирди», — дейди Трамп.

Бироқ ортидан Трамп воқеаларнинг Россия томонидан тақдим этилаётган талқинига қарши чиқди. У ўзининг «Truth Social» ижтимоий тармоғида «New York Post» газетасида чоп этилган мақолани улашди. Унда Москва дрон ҳужумидан музокараларни издан чиқариш учун фойдаланаётгани ҳақида даъво билдирилган.

Шунингдек, мақола сарлавҳасида «Путиннинг ҳужумдан ғазаби Россия тинчлик йўлида туриб олганини кўрсатади» каби жумлалар келтирилган.

Таҳлилчилар Трампнинг мазкур постини Путинни тинчликка тайёр деб баҳолаган баёнотларидан кескин чекиниш сифатида баҳоланмоқда. Бу қадам АҚШ президентининг Украина позициясига яқинлашаётганидан далолат бериши мумкин.

Украина президенти Владимир Зеленский эса Москва ҳужумни Украинанинг кейинги зарбаларига ва АҚШнинг дипломатик саъй-ҳаракатларига путур етказиш учун баҳона сифатида уюштирганини таъкидлаган.