Афғонистондан контрабанда қилинган наркотик модданинг ноқонуний айланмасига чек қўйилди. Бу ҳақида «Хавфсизлик» Telegram-канали хабар берди.

Унда айтилишича, Давлат хавфсизлик хизмати ходимлари томонидан ўтказилган тезкор тадбир давомида, «Тошкент-Андижон» йўналишида ҳаракатланаётган Андижон шаҳрида яшовчи, 1988 йилда туғилган фуқаро бошқарувидаги «Cobalt» русумли транспорт воситаси Тошкент вилоятининг Оҳангарон туманида жойлашган «Чинор» йўл патруль хизмати масканида тўхтатилиб, кўздан кечирилган.

Текширув давомида машинада у билан кетаётган шериги – Қирғиз Республикасининг Ўш шаҳрида яшовчи, 1971 йилда туғилган Қирғизистон фуқаросининг ёнида 4 кг 897 гр «гашиш» моддаси борлиги аниқланиб, процессуал тартибда расмийлаштириб олинган.

Шунингдек, Қирғиз Республикаси фуқароси ушбу моддани Бухоро туманидаги дала майдонидаги хуфия жойдан олгани аниқланиб, мазкур ҳудуд кўздан кечирилганда, у ерда яна 45 кг 52 гр. «гашиш» моддаси борлиги маълум бўлган.

Ҳозирда мазкур шахсларга нисбатан Давлат хавфсизлик хизматининг Бухоро вилояти бўйича бошқармаси Тергов бўлими томонидан Жиноят Кодексининг 246 ва 273-моддалари билан жиноят иши қўзғатилиб, «қамоқ» эҳтиёт чораси қўлланилган.

Терговга қадар текширув давомида, муқаддам учинчи шахслар томонидан Афғонистондан контрабанда йўли билан Бухоро вилоятига етказиб берилган ушбу қарийб 50 кг гиёҳвандлик воситаси Ўзбекистон ҳудудидан транзит сифатида олиб ўтилиши керак бўлгани маълум бўлган.