Самарқандда хориждан ёзги таътилда бувисиникига келган 16 ёшли мактаб ўқувчиси бурун операциясидан сўнг вилоят шифохонасида вафот этди. Бу ҳақда «Миллий» телеканалида хабар қилинди.

Қайд этилишича, қиз нафас олишда қийналаётгани учун 1 июль куни бувиси билан вилоят марказий шифохонасига борган. Шифокорлар унга жарроҳлик амалиёти ўтказилиши кераклигини айтишган.

«Учта шифокорни кўрдим. Учаласи ҳам шу операция қилиш кераклигини айтишди. Бурни «маҳкам» эдию, салгина қийшиқ экан. Соат 11 ларда операцияга олиб кирди. Кутдим, лекин операция давом этаётганини, набирам ҳали ҳушига келмаганини айтишди. Тахминан бир ярим соат ўтгач, операция бўлимига бир гуруҳ шифокорлар аппарати билан кириб келишди», деган марҳуманинг бувиси.

Касалхонада айтилишича, операциядан кейин беморнинг саломатлиги ёмонлашган ва у вафот этган. Фуқаронинг яқин қариндошлари ҳодисада шифокорларни айбдор деб ҳисобламоқда.

Маълум қилинишича, вилоят прокуратураси томонидан суд-тиббий экспертиза тайинланди. Ҳозирда терговга қадар текширув ва расмий текширувлар олиб борилмоқда.

Таъкидлаш жоиз, бу қизча шу турдаги операцияларда вафот этганларнинг биринчиси эмас. Аввалроқ ҳам Фарғона вилоятининг Фарғона шаҳрида жойлашган хусусий клиникада бурнини операция қилдирган 33 ёшли прокуратура ходими вафот этгани ҳақида хабар қилгандик.

Ушбу фуқаро ҳам операция қилдириш учун ўз оёғи билан кирган, бироқ қайтиб чиқмаганди. Операция соат 18:00 да бошланган, 22:30 да эса беморнинг вафот этгани маълум бўлган.