Саминжон ҲУСАНОВ/«Халқ сўзи». Булоқбоши туманида аҳолининг куз-қиш мавсумидаги электр энергияси таъминоти билан боғлиқ муаммолар ижобий ечим топади. Бунинг учун «Булоқбоши» подстанциясида трансформаторларни янгилаш ишлари олиб борилмоқда.

— Бу подстанция шу кунгача 2,5 мегавольт-ампер қувватида ишлаётган эди, — дейди «Андижон магистрал электр тармоқлари» АЖ ходими Алижон Раҳимов. — Сўнгги йилларда аҳоли сонининг ортиши натижасида истеъмолчилар эҳтиёжини қондира олмай қолди. Бу эса куз-қиш мавсумида таъминотдаги узилишларга сабаб бўлаётганди. Эндиликда 16 мегавольт-ампер кучланишдаги янги трансформаторлар ишга туширилмоқда. Бу билан 11 минг 400 та хонадонлар ва 522 та корхона-ташкилотларни сифатли электр энергияси билан таъминлашга эришилади.

Бу каби жараён Андижон вилоятининг бошқа ҳудудларида ҳам давом этмоқда. Жумладан, айни пайтда Андижон шаҳридаги «Ёйилма», Асака туманидаги «Асака», Хўжаобод туманидаги «ЖФК-О» подстанцияларида ҳам таъмирлаш ва бунёдкорлик ишлари олиб бориляпти. Бўстон ва Улуғнор туманларида 506 миллиард сўмлик лойиҳа асосида янги подстанциялар қуриляпти. Хулоса қилиш мумкинки, электр таъминотида туб ўзгаришлар юзага келмоқда.