Фото: "Халқ сўзи Online"

Саминжон Ҳусанов, “Халқ сўзи Оnline”/Андижон. Давлатимиз раҳбари 2017 йилда Андижон вилоятига ташрифи давомида Булоқбоши туманида бўлиб, ҳудудда ишлаб чиқариш корхоналарини ташкил этиш, аҳолини иш билан таъминлаш, туман иқтисодиётини юксалтириш масалаларига алоҳида тўхталган эди.

Жумладан, “Shenfen-bridge of friendship” МЧЖ шаклидаги Ўзбекистон-Хитой қўшма корхонаси қурилиши лойиҳасига алоҳида тўхталиб, унинг истиқболи хусусида фикр билдирган эди. Зеро, Булоқбоши тумани саноат маҳсулотлари ишлаб чиқариш суръати паст ҳудудлардан бўлиб, унинг вилоятдаги улуши атиги 1,4 фоизни ташкил этади. Қурилишига асос солинган цемент заводи ишга тушгач, бу кўрсаткич кескин ортади. Боиси, 203,9 миллион АҚШ доллари ҳажмидаги лойиҳа амалга оширилгач, туманда саноат маҳсулотлари ишлаб чиқариш ҳажми 5 маротаба ортади. 750 кишининг бандлиги таъминланади. Бу ерда ишлаб чиқариладиган хом ашё, нафақат, ички бозорни таъминлайди, балки ҳар йили 20 миллион АҚШ доллари миқдоридаги экспорт амалиёти ҳам бажарилади.

“Zhejiang Shangfeng Building Materials Co. Ltd” компанияси Хитойдаги 50 та энг йирик компаниялардан бири ҳисобланади. 40 йиллик тажрибага эга компаниямиз энергия тежамкор ва экологик тоза маҳсулотлари билан машҳур. Булоқбоши туманининг Чилустун тоғ тизмасида қурилиши бошланаётган цемент ишлаб чиқариш корхонасини ҳамкорликда барпо этиш орқали Ўзбекистон Республикаси иқтисодиёти юксалишига ҳисса қўшишимиз мумкинлигидан хурсандман”, - дейди компания раҳбари Ма Мин Лянг.

Йилига 1 миллион 200 минг тонна маҳсулот ишлаб чиқарадиган корхонага асос солиниши бошқа турдаги корхоналарнинг вужудга келишига ҳам асос бўлади. Боиси, завод қурилиши туфайли туманга темир йўл, автомобиль йўли ва коммуникация тармоқлари кириб келади.