Иллюстратив фото

Ижтимоий тармоқларда Бухоро вилояти Шофиркон туманида 2 йиллик помидор консервасини истеъмол қилган аёл заҳарланиб, вафот этгани ҳақида хабарлар тарқалди. Туман ҳокимлиги ахборот хизмати ушбу ҳолат бўйича расмий муносабат билдирди.

Қайд этилишича, жорий йилнинг 11 январь куни Шофиркон туман тиббиёт бирлашмасига бир оиладан 4 нафар шахс соғлигидаги ёмон ўзгаришлар сабаб мурожаат қилиб келган.

Вилоят СЭОМ томонидан ўтказилган текширув натижаларига кўра, ушбу фуқаролар ботулизм касаллигига чалингани аниқланган. Шундан сўнг уларга вилоятнинг малакали мутахассислари томонидан мунтазам равишда керакли амалий ёрдам кўрсатилган.

Даво муолажаларидан сўнг, оиланинг 3 нафар аъзоси соғлиғида ижобий ўзгаришлар юз берган ва мутахассислар томонидан уйларига кетишига рухсат берилган.

Бироқ бемор И.Ш.да тузламадан кўпроқ истеъмол қилгани, касаллик аломатлари оғир кечиши оқибатида кўрсатилган реанимацион чора-тадбирларга қарамасдан биологик ўлим ҳолати қайд этилган.