Европа чемпионлар лигаси умумий босқичининг сўнгги 8-тур баҳслари, бугун, 29 январь куни, бошланади. Сўнгги турдан ўрин олган барча учрашувлар бир вақтда, Тошкент вақти билан 30 январга ўтар кечаси соат 01:00 да бошланади.

ЕЧЛнинг 8-турига келиб бир нечта йирик жамоаларнинг турнирни давом эттириши сўроқ остида қолмоқда. Бу уларнинг сўнгги тургача тўплаган очколари билан боғлиқ.

Жумладан, ҳамюртимиз Абдуқодир Ҳусанов тўп тепадиган «Манчестер Сити» жамоаси 7 тур давомида бор йўғи 8 очко тўплаган ҳолда 25-ўринни эгаллаб турибди. «Шаҳарликлар» нимчорак финалга ўтиши учун бугун тунда Бельгиянинг «Брюгге» жамоасини таслим қилишлари керак бўлади. «Ман Сити» мағлубиятга учраса ёки дурранг қайд этса, ЕЧЛнинг кейинги босқичига ўта олмайди. Бу эса клубнинг Чемпионлар лигаси тарихида қайд этган энг ёмон натижасига айланади.

Бундан ташқари, Франциянинг «ПСЖ» клуби ҳам турнирда қайд этаётган натижаси билан мақтана олмайди. Жамоа ортда қолган 7 турдан сўнг 10 очко жамғариб турнир жадвалида 22-ўриндан жой олган. Парижликлар бугун тунда Германиянинг «Штутгард» жамоасига қарши, меҳмонда тўп суради. «ПСЖ» мағлубиятга учраса турнирдаги иштирокини шу ердаёқ якунлайди.

Турнирнинг шу босқичига келиб, 8 та жамоа нимчорак масаласини ҳал қилишга улгурган. Англиянинг «Ливерпул» жамоаси 7 турдан кейин 100 фоизлик натижа кўрсатган ҳолда турнир жадвалида пешқадам бўлиб турибди. Ундан кейинги ўринларда «Барселона», «Арсенал», «Интер», «Атлетико», «Милан» ҳамда «Байер» жамоалари кучли саккизликка якун ясаган.

Бугун бўлиб ўтиши белгиланган 8-тур баҳсларида «Манчестер Сити» – «Брюгге», «Янг Бойз» – «Црвена Звезда», «Спортинг» – «Болонья», «Лилль» – «Фейеноорд», «Динамо Загреб» – «Милан», «Жирона» – «Арсенал», «Ювентус» – «Бенфика», «Штутгарт» – «ПСЖ», «Интер» – «Монако», «Зальцбург» – «Атлетико Мадрид», «Байер» – «Спарта Прага», «ПСВ» – «Ливерпуль», «Брест» – «Реал Мадрид», «Барселона» – «Аталанта», «Боруссия Д» – «Шахтёр Донецк», «Штурм» – «РБ Лейпциг», «Бавария» – «Слован Бр», «Астон Вилла» – «Селтик» клублари кейинги босқич масаласини ҳал қилиш учун саф тортишади.

Маълумот учун, Европа чемпионлар лигасининг янги форматига кўра, энг кўп очко тўплаган саккизта жамоа нимчорак финалга тўғридан-тўғри йўлланмани қўлга киритади. 9-24 ўринларни эгаллаган иштирокчилар плей-офф ўйинлари орқали нимчорак масаласини ҳал қилишади. Энг кам очко тўплаган 12 та жамоа эса турнир билан хайрлашади.

Эслатиб ўтамиз, Абдуқодир Ҳусановни Европа чемпионлар лигаси ўйинларида кўришимиз «шаҳарликлар»нинг бугунги ғалабасига боғлиқ. УЭФА қоидаларига кўра, клубга янги қўшилган футболчи фақатгина турнирнинг плей-офф босқичидагина жамоа қайдномасига киритилади. «Ман Сити» бугун мағлубиятга учраса ёки дурранг қайд этса Ҳусановни бундай йирик турнирда кўриш имкониятимиз кейинги мавсумга қолиб кеташи мумкин.