7-15 апрель кунлари Франция пойтахти Париж шаҳрида «Freestyle Chess Grand Slam Tour» турнирининг навбатдаги босқичи бўлиб ўтади. Бу ҳақида «UzChess» хабар бери.

Маълум қилинишича, мазкур турнирда 12 нафар дунёнинг энг кучли шахмат усталари иштирок этиши белгиланган. Бугунга келиб, уларнинг 11 нафари аниқ бўлиб улгурган. Яна бир нафар иштирокчи эса, бугун ва эртага бўлиб ўтадиган саралаш мусобақаларида аниқланади. Ушбу саралаш баҳсларида 16 нафар халқаро гроссмейстер битта йўлланма учун кураш олиб боришади.

Саралаш босқичининг биринчи баҳсларидан 4 нафар маҳоратли гроссмейстер, жумладан, эронлик Муҳаммад Амин Табатабаи, Вьетнамлик Нгуен Нгок, озарбайжонлик Рауф Мамедов ва ҳиндистонлик Пранеш Муниретинам ҳал қилувчи саралаш босқичига йўл олишган.

Аҳамиятлиси шундаки, иккинчи босқичда ягона йўлланма учун кураш олиб борувчи шахматчилар орасида ҳамюртларимиз Нодирбек Абдусатторов ҳамда Жавоҳир Синдаров ҳам бор.

Қуръа натижаларига кўра, Нодирбек Абдусатторов 1/8 финалда биринчи саралаш босқичи ғолиби ҳиндистонлик Пранеш Муниретинам билан баҳсга киришади. Ушбу баҳс ғолиби 1/4 финалда хитойлик Динг Лирен ҳамда ҳиндистонлик Видит Гужрати учрашуви ғолибига қарши дона суради.

Шунингдек, яна бир юртдошимиз Жавоҳир Синдаров эса америкалик Ленер Домингесга қарши баҳсга киришади. Синдаров ушбу баҳсда ғалабага эришса америкалик Аронян ҳамда эронлик Амин Табатабайи учрашуви ғолиби билан баҳсга киришади.

Таъкидлаш жоизки, Абдусатторов ҳамда Синдаровнинг ўзаро баҳси фақатгина ярим финалда бўлиб ўтиши мумкин.

Маълумот учун, «Freestyle Chess Grand Slam Tour Paris» турнирининг мукофот жамғармаси 660 минг АҚШ долларини ташкил қилади. Турнир ғолиби 200 минг АҚШ долларига эга чиқади. Иккинчи ўрин соҳиби 140 минг, учинчи ўринни эгаллаган шахматчи эса 100 минг АҚШ долларини қўлга киритади.