Фото: Guardian

Буюк Британиядаги умумий сайловларда Кир Стармернинг Лейбористлар партияси (ишчилар партияси — таҳрир) кўпчилик ўрин билан ғалаба қозонди. Буни халқаро ОАВлар катта «сенсация» сифатида талқин қилди.

Қайд этилишича, сайловда лейбористлар камида 326 ўринга эга бўлди. Бу эса Вакиллар палатасида зарур бўлган 320 ўриндан кўп деганидир. Ушбу ғалаба Стармерни Буюк Британиянинг навбатдаги Бош вазири бўлиш йўлидаги энг катта қадамдир.

2022 йил 25 октябридан бери Бирлашган Қироллик бош вазири лавозимида ишлаётган Риши Сунакнинг Консерватив партияси тарихий мағлубиятга учради. Бу эса катта эҳтимол билан унинг курсисидан «айрилиб» қолишини англатади. Консерваторлар Вакиллик палатасида атиги 131 та жойни эгаллай олишган.

Стармер ғалабани нишонлаб, «миллий янгиланиш»га ваъда берди. У ушбу муваффақият билан боғлиқ масъулият, мамлакатни бирлаштирган ғояларни янгилаш зарурлигини таъкидлади. Лондондаги ғалаба зиёфатида Стармер «Ўзгариш энди бошланади», дея эълон қилган.

«Умид 14 йилдан кейин ўз келажагини қайтариш имкониятига эга бўлган мамлакатда яна бир бор порлайди», деган у. Ўз навбатида, Сунак Стармерга қўнғироқ қилиб, уни ғалабаси билан табриклади.

Аввалроқ, Буюк Британиянинг яқин ҳамкорларидан бўлган Австралияда бош вазир Фаластинни қўллаган сенаторнинг вазифасидан четлатилиши ортидан муаммолар келиб чиққани ҳақда хабар берган эдик.