Америкалик боксчи Теренс Кроуфорд иккинчи ўрта вазн тоифасида мутлақ жаҳон чемпиони унвонидан маҳрум этилди, деб хабар берди «BoxingScene».

Таъкидланишича, Жаҳон бокс кенгаши (WBC) Кроуфорддан ўз камари­ни олиб қўйган. Сабаб — боксчи охирги икки жанг бўйича тўланиши керак бўлган бадалларни тўламаган.

WBC президенти Маурисио Сулейманнинг сўзларига кўра, Кроуфорд сентябрь ойида мексикалик Сауль Альварес устидан қозонган ғалабадан сўнг ташкилотга тўлаши керак бўлган 300 минг доллар (унинг 50 миллион долларлик гонорарининг 0,6%) миқдоридаги бадални тўламаган.

Шунингдек, у 2024 йил августида ўзбекистонлик Исроил Мадримов устидан қозонган ғалабаси учун ҳам WBCга тўланиши лозим бўлган улушни бермаган.

Эндиликда бўш қолган WBC камари учун британиялик Хамза Шираз ва франциялик Кристиан Мбилли рингга чиқади.

Эслатиб ўтамиз, сентябрь ойида Теренс Кроуфорд ҳакамлар бир овоздан берган қарор билан Сауль Альваресни мағлуб этиб, иккинчи ўрта вазнда мутлақ жаҳон чемпионига айланганди. Шу тариқа у ўз фаолиятида учинчи вазн тоифасида мутлақ чемпион мақомига эришган эди.