Amerikalik bokschi Terens Krouford ikkinchi oʻrta vazn toifasida mutlaq jahon chempioni unvonidan mahrum etildi, deb xabar berdi “BoxingScene”.

Taʼkidlanishicha, Jahon boks kengashi (WBC) Krouforddan oʻz kamari­ni olib qoʻygan. Sabab — bokschi oxirgi ikki jang boʻyicha toʻlanishi kerak boʻlgan badallarni toʻlamagan.

WBC prezidenti Maurisio Suleymanning soʻzlariga koʻra, Krouford sentyabr oyida meksikalik Saul Alvares ustidan qozongan gʻalabadan soʻng tashkilotga toʻlashi kerak boʻlgan 300 ming dollar (uning 50 million dollarlik gonorarining 0,6%) miqdoridagi badalni toʻlamagan.

Shuningdek, u 2024-yil avgustida oʻzbekistonlik Isroil Madrimov ustidan qozongan gʻalabasi uchun ham WBCga toʻlanishi lozim boʻlgan ulushni bermagan.

Endilikda boʻsh qolgan WBC kamari uchun britaniyalik Xamza Shiraz va fransiyalik Kristian Mbilli ringga chiqadi.

Eslatib oʻtamiz, sentyabr oyida Terens Krouford hakamlar bir ovozdan bergan qaror bilan Saul Alvaresni magʻlub etib, ikkinchi oʻrta vaznda mutlaq jahon chempioniga aylangandi. Shu tariqa u oʻz faoliyatida uchinchi vazn toifasida mutlaq chempion maqomiga erishgan edi.