RBC хабарига кўра, Chainalysis компаниясининг ҳисоботида 2025 йилда бутун дунё бўйлаб хакерлик ҳужумлари оқибатида етказилган жами зарар 3,4 миллиард АҚШ долларидан ошгани қайд этилган.

Мутахассисларнинг таъкидлашича, тасдиқланган ҳужумлар сони камайган бўлсада, уларнинг молиявий зарари ортган. Хусусан, КХДР (Шимолий Корея) билан боғлиқ хакерлик гуруҳлари бир йил давомида 2,02 миллиард долларлик криптовалютани ўғирлаб, ўтган йилга нисбатан кўрсаткични 51 фоизга оширган. Бу кузатувлар тарихидаги энг юқори натижа ҳисобланади.

Маълумотларга кўра, ўғирланган маблағларнинг катта қисми марказлашган платформалар ҳиссасига тўғри келган. Бундай ҳолатларда хакерлар фойдаланувчиларнинг махфий (private) калитларига эга бўлган. Йилнинг биринчи чорагида айнан шу турдаги ҳужумлар жами йўқотишларнинг 88 фоизини ташкил этган.

Шунингдек, мутахассислар 158 мингта шахсий криптоҳамён бузилиши ҳолатини қайд этган бўлиб, уларнинг умумий зарари 713 миллион долларни ташкил қилган. Таққослаш учун, ўтган йили бу кўрсаткич 1,5 миллиард доллар бўлган. Жабрланган фойдаланувчилар сони 80 мингдан ортиқ.

Ҳисоботда айтилишича, ўғирланган маблағларни легаллаштириш (пул ювиш) жараёни кўпинча хитой тилида фаолият юритувчи OTC-сервислар, криптокўприклар (bridges) ва миксерлар орқали амалга оширилган. Йирик ўғирликлардан сўнг маблағларни нақдлаштиришнинг ўртача цикли 45 кунни ташкил этади.