Фото: AP

АҚШ Венесуэлага уруш билан таҳдид қилмоқда ва республикадаги ҳукуматни ўзгартиришга ҳаракат қилмоқда. Бу фикрларни Венесуэла президенти Николас Мадуро айтиб ўтди.

«Бугун биз Кариб денгизида Венесуэлага қарши уруш таҳдидига дуч келяпмиз, АҚШ табиий бойликларимизни тортиб олишга ва қўғирчоқ ҳукумат ўрнатишга уринмоқда», — деди Мадуро Суверенлик ва тинчлик бўйича Миллий кенгаш йиғилишида.

Унинг сўзларига кўра, бу таҳдидни зарарсизлантириш ва енгиш учун Венесуэладаги «барча келишмовчиликларни тугатиб» бирлаштириш зарур.

Шу йилнинг 2 сентябрь куни АҚШ президенти Дональд Трамп АҚШ ҳарбий-денгиз кучларининг халқаро сувларда ўтказган операцияси натижасида Венесуэла наркокартелининг ўн бир аъзоси йўқ қилинганини маълум қилди. Бунга жавобан Мадуро ўз мамлакати сўнгги асрдаги АҚШ босқинининг энг жиддий таҳдидига дуч келганини айтди ва йигирма беш минг аскарни сафарбар қилишни буюрди.

Шу муносабат билан Венесуэла президенти ва Миллий боливар қуролли кучлари олий қўмондони Николас Мадуро мамлакатни ҳимоя қилиш режасини фаоллаштирди. Бу ҳақда сиёсатчининг ўзи «Venezolana de Televisiоn» телеканалида маълум қилди.

«Пайшанба куни биз халқни «Мустақиллик 200: фаол қаршилик ва тинимсиз ҳужум» деб номланган режа бошлангани ҳақида хабардор қиламиз», — деди Мадуро.

У мамлакатни ҳар томонлама мудофаа қилиш бўйича тезкор чора-тадбирларни амалга ошириш бошланганини, бунда қуролли кучлар ва халқ милицияси иштирок этаётганини маълум қилди. Мадуронинг таъкидлашича, «коммуналар уюштирилган ва ҳар қандай ностандарт вазиятларда барча йўналишдаги вазифаларни бажаришга тайёр».

Мадуро Венесуэла ўз саъй-ҳаракатлари билан эришилган тинчликни ҳимоя қилиш ниятида эканлигини таъкидлади ва «хотиржамлик, жасорат, матонат ва собит эътиқод билан император таҳдидларини рад этувчи венесуэлаликларнинг мутлақ кўпчилигининг ватанпарварлигидан» мамнунлигини билдирди.