АҚШ Венесуэла қирғоқларига тахминан 16 минг нафар ҳарбий хизматчини жойлаштирди, деб хабар бермоқда “The Washington Post”.

Манбага кўра, мазкур куч таркибида 10 минг аскар ва 6 минг денгизчи бор. Улар 8 та ҳарбий кема, махсус операциялар кемаси ҳамда Кариб денгизида жойлашган атом сувости кемаси орқали ҳаракатланмоқда.

Яқин кунларда ушбу кучларга “USS Gerald R. Ford” авиаташувчиси ҳам қўшилиши кутилмоқда. У билан бирга яна учта эскорт кема ва 4 мингдан ортиқ ҳарбий келиши мумкин. Таҳлилчилар бу ҳаракатни кенг кўламли ҳарбий операцияга тайёргарлик сифатида баҳоламоқда.

Бу ҳарбий ҳаракатлар Вашингтон ва Каракас ўртасидаги тортишувлар кучайган бир пайтда содир бўлмоқда. АҚШ Венесуэлани “наркотеррорист” гуруҳларга ёрдам беришда айблаган бўлса, президент Николас Мадуро бу айбловларни рад этиб, “янги уруш учун баҳона яратиш ҳаракати” деб атаган.

Спутник тасвирларига кўра, F-35 ҳарбий самолётлари АҚШнинг Пуэрто-Рикодаги ҳарбий базасида жойлаштирилган. Таҳлилчиларнинг фикрига кўра, бу кучлар одатий наркотикларга қарши операциялардан кўра кенгроқ миссия учун тайёрланмоқда.

Айни пайтда Оқ уйнинг Венесуэладаги эҳтимолий ҳарбий объектларни аниқлаётгани ҳақида ҳам хабарлар бор. Президент Дональд Трамп бу даъволарни рад этган бўлса-да, у CIAʼнинг махфий операцияларига рухсат берганини тасдиқлаган.