20 декабрь, шанба куни АҚШ хавфсизлик хизматлари халқаро сувларда яна бир нефть танкерини тўхтатди. Бу қадам АҚШнинг Венесуэла нефтига қарши олиб бораётган блокадаси даврида содир бўлди, деб ёзмоқда «The Guardian»

Қайд этилишича, Панама байроғи остидаги “Centuries” деб аталган танкер Барбадос шарқидаги Кариб денгизида тўхтатилган. Манбаларга кўра, ушбу кема АҚШ санкциялари рўйхатида бўлмаган, бу эса блокада қўлланилиши кучайтирилганини англатиши мумкин.

Ички хавфсизлик вазири Кристи Ноемнинг сўзларига кўра, АҚШ санкцияланган нефтьни ноқонуний ташиш билан шуғулланувчи субъектларни топиб, тўхтатишда давом этади. Маъмурият шунга ишора қиладики, Венесуэла нефтини ташувчи ҳар қандай кема АҚШ блокадасига тушиши мумкин ва санкцияланган кемалар рўйхати кенгайтирилмоқда.

Декабрь ойи бошида қўлга олинган биринчи танкер санкцияланган ва Оқ уй томонидан “қора бозордаги нефть ташувчи shadow-кема” деб аталган. Бу ҳодиса Венесуэла президенти Николас Мадуро армияга нефть танкерларини эскорт қилишни буюрган пайтга тўғри келади. Биринчи танкер қўлга олингач, Венесуэла ҳукумати бу ҳаракатни “очиқ ўғрилик” ва “халқаро қароқчилик” деб баёнот қилганди.

Трамп NBC Newsʼга берган интервьюсида, Мадуро режими билан можаро эҳтимоли ҳануз ҳам мавжудлигини айтди. Шу ҳафта АҚШ Венесуэлага босимни кучайтириб, мамлакатни АҚШ нефтини олиб қўйганликда айблади ва барқарор инвестицияларни йўқотганини маълум қилди. 16 декабрь куни Трамп барча санкцияланган нефть танкерларини Венесуэлага кириш ва чиқишдан тўлиқ блокада қилишни буюрди.

Венесуэла хом нефти экспортлари кескин камайди. Кўплаб танкерлар санкцияланган бўлсада, баъзилари, жумладан Chevron компанияси, Венесуэла нефтини ўз рухсатномаси билан ташийди. Хитой энг йирик харидор бўлиб, мамлакат импортининг тахминан 4 фоизини ташкил қилади. Декабрь ойида етказиб бериш кунига 600 минг баррел атрофида бўлиши кутилмоқда.

“Shadow fleet” сифатида аталувчи яширин танкерлар ва санкцияланган кемалар орқали нефть савдоси давом этмоқда. “Centuries” кемаси Венесуэлда 1,8 млн баррел “Merey” нефтини Хитойга юбориш учун олиб кетган ва бу ҳақда PDVSA ички ҳужжатларида маълум қилинган. Венесуэла сувларидан у қисқа муддат армия эскортида чиқиб кетган. Ҳозирги вақтда Венесуэла сувларидаги 70 дан ортиқ “shadow fleet” кемасидан тахминан 38 таси АҚШ молия вазирлиги санкцияси остида, шундан 15 тасига нефть ва ёқилғи юкланган.