Фото: AP

АҚШ келаси ҳафта охиригача Украинага ATACMS оператив-тактик ракеталарини ўз ичига олган ҳарбий юкларни етказиб беришни тиклаши мумкин. Бу фикрларни АҚШ Сенати разведка қўмитаси раиси Марк Уорнер CBS телеканалига берган интервьюсида айтиб ўтди.

Унинг таъкидлашича, 23-24 апрель кунлари сенаторлар Киев расмийларига қарийб 61 миллиард доллар ажратиш тўғрисидаги қонун лойиҳасини маъқуллаб, Оқ уй раҳбари Жо Байденга имзолаш учун тақдим этади.

«Умид қиламанки, президент имзолаганида бу материаллар ҳафта охиригача етиб боради», деди Уорнер.

«Украинага етказиб бериладиган узоқ масофали ўқ отиш қуроллари бўладими?», деган саволга қўмита раҳбари ижобий жавоб бериб, Америка маъмурияти сўнгги икки ой давомида ATACMS ракеталарини топширишга тайёргарлик кўрганини ва бу ҳақда бир кун олдин тасдиқланган ҳужжатда айтилганини таъкидлади.

ATACMS — Lockheed Martin корхонаси томонидан ишлаб чиқилган тезкор-тактик баллистик ракета ҳисобланади. У бир нечта ракета тизимларидан, шу жумладан M142 HIMARSдан ҳам учирилиши мумкин.

Бир кун аввал АҚШ Конгресси Вакиллар палатаси кўпчилик овоз билан Украинага салкам 61 миллиард доллар ажратиш тўғрисидаги қонун лойиҳасини қабул қилди. Шундан 23,2 миллиарди Пентагон омборларидан ўтказилган қуролларни тўлдиришга йўналтирилиши таклиф қилинмоқда. Яна 13,8 миллиарди очиқ бозорда қурол сотиб олишга кетади, 11,3 миллиарди эса «минтақадаги давом этаётган АҚШ ҳарбий амалиётларини» қўллаб-қувватлаш учун мўлжалланган.

Конгрессменлар томонидан маъқуллангач, ҳужжат Сенатга юборилади, сўнгра у ерда қўллаб-қувватланса, президент Жо Байден томонидан имзоланиши учун юборилади.