БМТ Хавфсизлик Кенгаши Украинадаги урушга оид АҚШ томонидан тайёрланган «Тинчликка йўл» («The Path of Peace») номли резолюцияни қабул қилди. Мазкур ҳужжат урушни тезроқ якунлашга чақирса-да, Россияни агрессор сифатида номламаган.

24 февраль куни бўлиб ўтган овоз беришда Хавфсизлик Кенгашининг 15 аъзосидан 10 нафари резолюцияни қўллаб-қувватлади. АҚШ, Россия ва Хитой ҳам ҳужжатни маъқуллади. Беш давлат, шу жумладан, Буюк Британия ва Франция овоз беришда нейтрал қолди.

Бу — Украинада уруш бошланганидан бери БМТ Хавфсизлик Кенгаши томонидан қабул қилинган илк резолюциядир. Россиянинг БМТдаги вакили Василий Небензя ушбу ҳужжатни тинчликка эришиш йўлидаги муҳим қадам сифатида баҳолади.

Қайд этиш керакки, БМТ Бош Ассамблеяси ҳам Украинадаги урушга оид икки хил резолюцияни қабул қилди. Уларнинг мазмуни Россиянинг ҳаракатларини баҳолашда фарқ қилади.

Биринчи резолюция Украина ва Европа Иттифоқи давлатлари томонидан тайёрланган бўлиб, унда Россиядан Украина ҳудудидан ўз қўшинларини дарҳол олиб чиқиш ва ҳарбий ҳаракатларни тўхтатиш талаб қилинган.

Бу талаб БМТнинг аввал қабул қилган қарорларига мос келади. Ушбу ҳужжатни 93 давлат қўллаб-қувватлади, 65 давлат нейтрал қолди ва 18 давлат, шу жумладан, Россия ва АҚШ қарши овоз берди.

Иккинчи резолюция эса АҚШ томонидан тайёрланган бўлиб, унда Россиянинг ҳарбий агрессияси қораланмаган. Уруш «конфликт» деб аталган ва Россия босиб олган Украина ҳудудлари, халқаро ҳуқуқ бузилишлари ҳамда Украина ҳудудий яхлитлигини тиклаш зарурати тилга олинмаган.

Европа давлатлари ташаббуси билан ҳужжатга ўзгартишлар киритилиб, унда Украина ҳудудий яхлитлигини сақлаш ва «адолатли тинчлик»ка эришиш каби нуқталар қўшилди. Ушбу ўзгаришлардан кейин ҳам резолюцияни 93 давлат қўллаб-қувватлади. АҚШ ва Украина ҳамда яна 70 дан ортиқ давлат овоз беришда нейтрал қолди. Россия эса ушбу ҳужжатга қарши овоз берди.

БМТда қабул қилинган ушбу турли хил резолюциялар халқаро ҳамжамиятнинг Украинадаги урушга нисбатан қарашларида ҳануз бир хил фикр йўқлигини кўрсатмоқда. Халқаро муносабатларда бу жараён тинчлик музокараларига таъсир ўтказиши мумкин.