Фото: AP

АҚШ президенти Дональд Трамп ва Украина президенти Владимир Зеленскийнинг Канададаги G7 саммити доирасидаги амалга ошмаган учрашуви Киев учун зарба бўлди. Бу фикрларни Германиянинг «Berliner Zeitung» газетаси ёзди.

«Бу Киевга яна бир зарба бўлди ва АҚШ бу инқирозда европаликлардан бошқача фикр юритиши ва ҳаракат қилишининг яна бир исботи бўлди», дейилади мақолада.

Муаллифга кўра, Трампнинг Вашингтонга муддатидан олдин қайтиши Украинага «аччиқ хабар» бўлиб, бу можаро АҚШ учун иккинчи планга ўтаётганини англатади.

«Вашингтон учун Киев, Одесса ва бошқа жойларда содир бўлган ёнғин Теҳрон ва Тел-Авивдагидан камроқ хавфлидир», — дейилади мақолада.

Владимир Зеленский ва АҚШ президенти Доналд Трамп ўртасидаги учрашув 17 июнь куни Канададаги G7 саммити доирасида бўлиб ўтиши керак эди.

Душанба куни Оқ уй матбуот котиби Керолин Левитт Трампнинг Канададаги G7 саммитини эрта тарк этиб, Яқин Шарқдаги вазият туфайли АҚШга қайтишини айтди. Президентнинг ўзи G7 саммитини тарк этишини изоҳлар экан, «имкон қадар тезроқ» Вашингтонга қайтиши кераклигини таъкидлади. Кейинроқ у буни Эрон ва Исроил ўртасида ўт очишни тўхтатиш бўйича иш олиб бориш учун эмас, балки анча жиддийроқ нарса учун қилганига аниқлик киритди.

G7 саммити Канаданинг Кананаскис шаҳрида 16-17 июнь кунлари бўлиб ўтди, гарчи у дастлаб 15 июнь куни очилиши режалаштирилган бўлсада. Бу йилги саммитга Зеленский ва Ҳиндистон президенти Нарендра Моди ҳам таклиф этилган эди.