Россия-Украина урушининг 966 кунги тафсилотларига тўхталамиз. Россия кучлари Украинанинг жанубидаги Николай вилоятидаги энергетика инфратузилмасига ҳужум қилиб, тунда 56 та дрон ва битта ракета учирди. Маҳаллий губернаторнинг сўзларига кўра, Россия ғарбий Тернопил вилоятидаги саноат объектига ҳам ҳужум қилиши оқибатида катта ёнғин келиб чиққан ва кейин ўчирилган.

Украина пайшанба куни учирилган Россиянинг 136 та учувчисиз учоқларидан 51 тасини уриб туширди. Бу ҳақда мамлакат ҳаво кучлари хабар берган.

Кремль Украина президенти Владимир Зеленскийнинг чоршанба куни эълон қилган “Ғалаба режаси” Россия ва НАТО ўртасида тўғридан-тўғри можарога олиб келиши мумкинлигини яна бир бор таъкидлади.

Украина мудофаа вазири Рустем Умеров норвегиялик ҳамкасби Бьорн Арильд Грам билан музокаралар якунида Норвегия яқин келажакда Украинага олтита Ф-16 қирувчи самолётини етказиб берилиш ваъдасига эришган.

Франция президенти Эммануэл Макрон жума куни Берлинда АҚШ президенти Жо Байден, Буюк Британия бош вазири Кей Стармер ва Германия канслери Олаф Шольц билан учрашувда Украина учун хавфсизлик кафолатларини муҳокама қилишини маълум қилди.

Еврокомиссия раҳбари Урсула фон дер Ляйен ЕИ етакчилари иштирок этган Брюссел саммитидан сўнг Украина Европа Иттифоқига аъзо бўлиш йўлида сезиларли ютуқларга эришганини таъкидлади.

Шунингдек, Беларус президенти Александр Лукашенко Украинадаги инқирозни тартибга солиш бўйича ҳар қандай музокараларда Беларус иштирок этиши кераклигини айтди.

Санкциялар

АҚШ Хитой ва Россия корхоналарига Россиянинг Украинадаги урушида фойдаланилган ҳужумчи дронларини лойиҳалаш, қуриш ва жўнатиш учун иштирок учун янги санкциялар киритди.

Санкциялар Хитойнинг иккита ва Россиянинг битта корхонаси ҳамда унинг бош дирекоторига киритилган. Байден маъмуриятининг таъкидлашича, ташкилотлар Россияга Украинадаги узоқ масофали ҳужумлар учун қўлланиладиган Гарпия серияли ҳужумчи дронларини ишлаб чиқиш ва ишлаб чиқаришга бевосита ёрдам берган.

Шунингдек, Буюк Британия Россиянинг нефт танкерларининг соя флотига кирувчи яна 22 та кемага нисбатан санкциялар жорий қилди. Ғарб санкцияларига қарамай ишлаётган Россиянинг 43 га яқин нефт танкерларига Буюк Британия портлари ва Британия денгиз хизматлари томонидан тақиқ киритилган.