Фото: Андижон ЙҲХБ

Андижон вилояти Шаҳрихон туманида қувиб ўтиш қоидасини бузган «Nexia-3» қарама-қарши йўналишда келаётган юк машинасига бориб урилди. Вилоят Йўл ҳаракати хавфсизлиги бошқармаси ҳодиса юзасидан маълумот берди.

Қайд этилишича, воқеа кеча, 12 апрель куни Шаҳрихон тумани «Бегбачча» МФЙ ҳудудидан ўтган А-373 халқаро автомобиль йўлнинг 413 километрида юз берган. Андижон-Шаҳрихон йўналиши бўйлаб ҳаракатланаётган «Nexia-3» русумли транспорт воситаси ҳайдовчиси И.И. ўзидан олдинда кетаётган транспорт воситаларидан ўзиб кетишга уринган.

У йўлнинг ўнг томони, четки қисмида ҳаракатланган ва олдиндаги транспорт воситасига тўқнашмаслик учун кескин тормоз бериб, бошқарувни йўқотган. Шундан сўнг «Nexia-3» йўлнинг қарама-қарши томонидан келаётган IVECO русумли юк транспорт воситасининг тиркамаси, орқа чап томонига урилиб, йўл-транспорт ҳодисаси содир этган.

ЙҲХБга кўра, мазкур ЙТҲ оқибатида енгил автомашинадаги йўловчи шилинма тан-жароҳатини олиб, шифохонага мурожаат қилган. Ҳозирда мазкур ҳолат юзасидан Шаҳрихон тумани ИИБ ЙҲХБ томонидан суриштирув ишлари олиб борилмоқда.