Foto: Andijon YHXB

Andijon viloyati Shahrixon tumanida quvib oʻtish qoidasini buzgan “Nexia-3” qarama-qarshi yoʻnalishda kelayotgan yuk mashinasiga borib urildi. Viloyat Yoʻl harakati xavfsizligi boshqarmasi hodisa yuzasidan maʼlumot berdi.

Qayd etilishicha, voqea kecha, 12-aprel kuni Shahrixon tumani “Begbachcha” MFY hududidan oʻtgan A-373 xalqaro avtomobil yoʻlning 413 kilometrida yuz bergan. Andijon-Shahrixon yoʻnalishi boʻylab harakatlanayotgan “Nexia-3” rusumli transport vositasi haydovchisi I.I. oʻzidan oldinda ketayotgan transport vositalaridan oʻzib ketishga uringan.

U yoʻlning oʻng tomoni, chetki qismida harakatlangan va oldindagi transport vositasiga toʻqnashmaslik uchun keskin tormoz berib, boshqaruvni yoʻqotgan. Shundan soʻng “Nexia-3” yoʻlning qarama-qarshi tomonidan kelayotgan IVECO rusumli yuk transport vositasining tirkamasi, orqa chap tomoniga urilib, yoʻl-transport hodisasi sodir etgan.

YHXBga koʻra, mazkur YTH oqibatida yengil avtomashinadagi yoʻlovchi shilinma tan-jarohatini olib, shifoxonaga murojaat qilgan. Hozirda mazkur holat yuzasidan Shahrixon tumani IIB YHXB tomonidan surishtiruv ishlari olib borilmoqda.