Фото: Видеодан кадр

Ижтимоий тармоқларда Андижон вилоятида Damas русумли автомобилни кран каналдан чиқариб олаётгани акс этган видеотасвирлар тарқалди. «Халқ сўзи» мухбири мазкур ҳолат юзасидан маълумот олиш мақсадида вилоят Фавқулодда вазиятлар бошқармаси матбуот хизмати бошлиғи катта лейтенант Ҳаёт Раҳимов билан боғланди.

Билдирилишича, воқеа жорий йилнинг 21 май куни тунда Андижон вилояти Улуғнор туманида содир бўлган. 

Ўша куни соат тахминан 22:05 да Улуғнор тумани ИИБ профилактика инспектори ФВБ Марказий диспетчерлик хизматига қўнғироқ қилиб, мазкур туманда яшовчи А.А. ҳамда унинг хамрохи М.Ш. Damas русумли автомобилда ҳаракатланиб кетаётган вақтида Фазогир МФЙ ҳудудидан оқиб ўтувчи «Катта Андижон канали»га тушиб кетгани хақида хабар берган. 

Соат 22:15 ларда А.А.нинг жонсиз танаси каналнинг Фарғона вилояти худудидан оқиб ўтган қисмидан олиб чиқилган.

«Ҳозирда фуқаро  М.Ш.ни топиш учун Ёнғин-қутқарув отрядининг Сувда қутқарув гуруҳи томонидан сув остида қидирув ишлари олиб борилмоқда», дейди Ҳаёт Раҳимов.

Вилоят ФВБ ахборот хизмати бошлиғи шунингдек, ҳолат бўйича қўшимча маълумотлар берилишини таъкидлади.