Foto: Videodan kadr

Ijtimoiy tarmoqlarda Andijon viloyatida Damas rusumli avtomobilni kran kanaldan chiqarib olayotgani aks etgan videotasvirlar tarqaldi. “Xalq soʻzi” muxbiri mazkur holat yuzasidan maʼlumot olish maqsadida viloyat Favqulodda vaziyatlar boshqarmasi matbuot xizmati boshligʻi katta leytenant Hayot Rahimov bilan bogʻlandi.

Bildirilishicha, voqea joriy yilning 21-may kuni tunda Andijon viloyati Ulugʻnor tumanida sodir boʻlgan. 

Oʻsha kuni soat taxminan 22:05 da Ulugʻnor tumani IIB profilaktika inspektori FVB Markaziy dispetcherlik xizmatiga qoʻngʻiroq qilib, mazkur tumanda yashovchi A.A. hamda uning xamroxi M.Sh. Damas rusumli avtomobilda harakatlanib ketayotgan vaqtida Fazogir MFY hududidan oqib oʻtuvchi “Katta Andijon kanali”ga tushib ketgani xaqida xabar bergan. 

Soat 22:15 larda A.A.ning jonsiz tanasi kanalning Fargʻona viloyati xududidan oqib oʻtgan qismidan olib chiqilgan.

“Hozirda fuqaro  M.Sh.ni topish uchun Yongʻin-qutqaruv otryadining Suvda qutqaruv guruhi tomonidan suv ostida qidiruv ishlari olib borilmoqda”, deydi Hayot Rahimov.

Viloyat FVB axborot xizmati boshligʻi shuningdek, holat boʻyicha qoʻshimcha maʼlumotlar berilishini taʼkidladi.