Украинадаги урушни тугатиш масаласида Украина, АҚШ ва Россия вакиллари 23 январь куни Бирлашган Араб Амирликларида, Абу-Дабида учрашув ўтказади. Бу 2022 йилда Россия томонидан кенг кўламли босқин бошланганидан бери уч давлат вакиллари иштирокида ўтаётган илк учрашув ҳисобланади.

Россия президентининг ёрдамчиси Юрий Ушаков Абу-Дабида «хавфсизлик масалалари бўйича уч томонлама ишчи гуруҳ»нинг биринчи йиғилиши бўлиб ўтишини тасдиқлади. Аввалроқ Украина президенти Владимир Зеленский ҳам ушбу музокаралар ҳақида маълум қилган эди.

АҚШ президентининг махсус вакили Стив Уиткофф ҳамда унинг куёви Жаред Кушнер пайшанба куни кечқурун Россия президенти Владимир Путин билан уч соатдан ортиқ давом этган музокаралар ўтказди. Юрий Ушаков ушбу суҳбатларни «ниҳоятда мазмунли, конструктив, очиқ ва махфий» деб баҳолади.

Шу билан бирга, у ҳудудий масалалар ҳал этилмас экан, келишувга эришиш қийинлигини таъкидлаб, Россия Қуролли Кучлари жанг майдонида ҳужумларни давом эттиришини билдирди.

АҚШнинг урушни тугатиш бўйича саъй-ҳаракатлари ҳозирча жанговар ҳаракатларни тўхтатишга олиб келмади. Украинанинг Россия томонидан даъво қилинаётган ҳудудларни бериш масаласи музокараларда узоқ вақтдан бери асосий тўсиқ бўлиб қолмоқда.

Россия халқаро ҳуқуққа кўра суверен Украина ҳудуди ҳисобланган ҳудуднинг қарийб 20 фоизини, жумладан Луганск вилоятининг деярли барчасини ҳамда Донецк, Херсон ва Запорожье вилоятларининг айрим қисмларини эгаллаб турибди. Москва ушбу тўртта ҳудудни тўлиқ таслим этиш талабини ҳам илгари сурмоқда.

Маълум қилинишича, Россия делегациясига Бош разведка бошқармаси раҳбари адмирал Игор Костюков, Украина делегациясига эса Президент девони раҳбарининг ўринбосари, Бош штаб бошлиғи Андрей Гнатов бошчилик қилади. Оқ уй ҳозирча учрашув юзасидан расмий изоҳ бермади.

Шу куни Путин Уиткофф билан учрашув ўтказар экан, Россиянинг узоқ масофали бомбардимончи самолётлари Болтиқ денгизи устида беш соатлик патруль парвозини амалга оширди. Бу дипломатик музокаралар фонида куч намойиши сифатида баҳоланмоқда.

Давосда ўтган тадбирда сўзлаган Уиткофф музокаралар тақдири бир асосий масалага боғлиқ эканини айтди. Кейинчалик Европа расмийси CNN телеканалига ушбу масала ҳудудлар билан боғлиқ эканини тасдиқлади.

АҚШ президенти Дональд Трамп Давосдаги нутқида келишувга яқинлашилаётганини ҳис қилаётганини билдирди.
— Менимча, улар келишувга эриша оладиган нуқтага келди. Агар бундай қилмасалар, иккаласи ҳам аҳмоқ, — деди у Зеленский ва Путинни назарда тутиб.

Шу куни Владимир Зеленский ҳам Давосда нутқ сўзлаб, Европа етакчиларини Трампнинг Гренландия бўйича баёнотларига қарши чиққанидек, Путиннинг урушига ҳам қатъий қаршилик кўрсатишга чақирди.

Айни пайтда Украина Россиянинг ракета ва дрон ҳужумлари оқибатида қаттиқ совуқ шароитида иситишсиз қолган 1 миллиондан ортиқ аҳолини электр энергияси билан таъминлаш учун кураш олиб бормоқда.