Ушбу хабарда келтирилган масала юзасидан Тошкент шаҳар Адлия бошқармаси томонидан қуйидагича муносабат билдирилади:

Жорий йилнинг 17 октябрь куни соат 16:09 да фуқаро Р.Ш Яшнобод туман Адлия бўлими Давлат хизматлари марказига кадастр паспортини тайёрлаш хизматидан фойдаланиш учун ташриф буюрган ва соат 17:15 да фуқарога давлат хизмати кўрсатилиб ариза расмийлаштирилган ва ваколатли органга электрон тарзда юборилган.

Аммо, ушбу вақт оралиғида фуқаро марказ ходимига мурожаат этиб, навбатда кўп туриб қолганлигидан эътироз билдирган, шу ўринда марказ ходими фуқарога Ўзбекистон Республикаси Адлия вазирининг 2022 йил 1 июндаги 118-ум-сон буйруғи билан тасдиқланган Давлат хизматларини навбатсиз олиш учун ихтиёрий пуллик хизмат миқдори белгиланганлиги тўғрисида маълумот ва тушунтириш берган.

Ушбу тушунтиришларга қарамай Р.Ш томонидан ижтимоий тармоқларда қолган фуқаролар «4-5 соатдан бери кутмоқда, баъзилар эса 2 кунлаб қатнамоқда» деб ёлғон маълумот тарқатилган.

Маълумот учун: Маъмурий жавобгарлик тўғрисидаги кодекснинг 202-2-моддасига кўра ёлғон ахборотни тарқатиш БҲМнинг 50 баравари миқдорда жарима солишга сабаб бўлади.