Фото: Халқ сўзи

Сўлим Фарғона вилоятида ўтган ҳафта бўлиб ўтган “Адабиёт кунлари” кўпчиликнинг ёдида ёрқин таассуротлар қолдириб, сўз сеҳрининг қудрати барчани яна бир бор бадиятга мафтун этгани шубҳасиз.

Фарғона шаҳридаги муҳташам театр-концерт саройида Адабиёт байрами якунига бағишланган бадиий-маърифий тадбир ўтказилди.

— Аслида бу каби Адабиёт байрамини йилда бир маротаба эмас, ҳар чоракда ўтказиб туриш зарур, — деди тантанали тадбирда қатнашган Фарғона вилояти ҳокими Х. Бозоров. — Адабиётимиз вакиллари билан бундай учрашувларни шаҳар-туманлар марказлари, олис ҳудудларда ҳам ташкил этиш лозим. Бу борада вилоятда мунтазам равишда адабий тадбирлар, форумлар ташкил этиш режаси ишлаб чиқилаётганини таъкидлаб ўтиш ўринлидир.

Назм ва наво кечасида мумтоз адабиётимиз намояндаларининг гўзал байтлари, ардоқли ижодкорларимиз Эркин Воҳидов, Анвар Обиджоннинг умрбоқий шеърлари янгради. Санъаткорларимиз ижросида севимли шоирлар қаламига басталанган таниш, қадрдон оҳанглар жаранг сочди.

Байрам тадбирида бир гуруҳ ижодкорлар ва уларнинг оила аъзоларига эсдалик совғалари топширилди.

Ботир Мадиёров, “Халқ сўзи”.