Тошкент халқаро аэропортида 31, 23 ва 18 ёшли қизларни фоҳишалик қилиши учун Таиландга юбормоқчи бўлган 53 ёшли аёл қўлга олинди. Бу ҳақда Самарқанд вилояти Ички ишлар бошқармаси матбуот хизмати хабар қилди.

Маълум бўлишича, Тошкент шаҳрида яшовчи аёл жиноий гуруҳ тузиб, моддий жиҳатдан қийналган қизларни мўмай даромад топишга ишонтирган. У қизларни фоҳишалик ва қўшмачилик қилиш учун Таиландга жўнатиб, улардан фойдаланган ҳолда шаҳвоний эксплуатация қилишни режа қилгани ҳақида маълумот олинган.

Ислом Каримов номидаги Тошкент халқаро аэропорти ҳудудида ўтказилган тезкор-қидирув тадбирлари натижасида 53 ёшли аёл 3 нафар фуқарони Таиландга жўнатмоқчи бўлган вақтида ашёвий далиллар билан ушланган.

Аёлнинг Таиланддаги 53 ёшли таниши қизларни кутиб олиб, иш билан таъминлаши эвазига 5 минг АҚШ доллари юбориши ва 3 ой мобайнида фоҳишалик қилиб, пул ишлаб бериши шарти билан келишиб олингани маълум бўлган.

Мазкур ҳолат юзасидан Жиноят кодексининг 135-моддаси билан жиноят иши қўзғатилиб, гумонланувчи процессуал тартибда қамоққа олинган.

Аввалроқ одам савдоси жиноятини содир этиб Туркияда яшириниб юрган Ўзбекистонлик аёл Тошкентга экстрадиция қилингани ҳақида хабар қилгандик.