Австралия Бош вазири Скотт Моррисоннинг таъкидлашича, ҳукумат коронавирус пандемияси сабаб ўрнатилган чекловларни июлга қадар уч босқичда бекор қилади. Ҳар бир босқич тўрт ҳафта муддатга мўлжалланган.

Биринчи босқичда ресторанлар, кафелар, дўконлар, кутубхоналар, жамоат марказлари, ўйин майдончалари ва ўқув лагерлари очилади, 10 кишигача жамоат жойларида тўпланишига рухсат берилади.

Таъкидланишича, биринчи босқичда кафе ва ресторанларда 10 кишидан ортиқ одам бўлмаслиги керак.

Карантиндан чиқиш дастурининг иккинчи босқичида 20 кишига мўлжалланган учрашувларга рухсат берилади, яъни спорт заллари, гўзаллик салонлари, кинотеатрлар, галереялар ва истироҳат боғлари очилади. Давлатлараро саёҳатларга ҳам рухсат берилади.

Учинчи босқич эса биринчи ва иккинчи босқичнинг ижобий якунланишига қараб режалаштирилади.

Қайд этилишича, март ойидаёқ мамлакатда ижтимоий чекловлар ўрнатилгани сабаб коронавируснинг тарқалиш динамикаси анча пасайган. Айни пайтда кунига 20 тадан камроқ янги ҳолат қайд этилмоқда.

Сўнгги маълумотларга кўра, Австралияда 6927 киши коронавирус инфекциясини юқтириб олган, 97 нафар бемор вафот этган, 6124 киши соғайган.